«KEGOC» АҚ Батыс Қазақстанның энергожүйесін елдің Біртұтас электр энергетикалық жүйесімен (БЭЖ) біріктіру жөніндегі стратегиялық жобаның іске асырылуы жоспардан озық қарқынмен жүріп жатқанын атап өтеді. Жоба қазіргі таңда белсенді кезеңге өтіп, құрылыс-монтаж жұмыстарының көлемі тұрақты түрде артып, ресурстар жұмылдырылып отыр.

Жобаның негізгі нысандары — 220 кВ «Қарабатан» тарату пункті, 500 кВ «Өлке» қосалқы станциясы және 500 кВ «Өлке – Қарабатан» әуе электр беру желісі. Аталған нысандарды іске қосу Батыс аймақ пен Қазақстан энергожүйесінің негізгі бөлігі арасында сенімді транзиттік дәліз қалыптастыруды қамтамасыз етеді.

«Қарабатан» тарату пунктінде 500 кВ кернеу класына жататын негізгі күштік жабдықтар жеткізілді. Оның ішінде автотрансформаторлар, элегазды ажыратқыштар, айырғыштар мен реакторлар бар. Автотрансформаторлар отандық Asia Trafo кәсіпорнында өндірілген, бұл ауқымды инфрақұрылымдық жобаны жүзеге асырудағы қазақстандық өнеркәсіптің үлесін айқындайды. Сонымен қатар жабдықтарға арналған іргетас салу жұмыстары жүргізілуде, жедел басқару пунктінің ғимараты тұрғызылып, сыртқы қоршау бөліктері орнатылуда.

500 кВ «Өлке» қосалқы станциясында ашық тарату құрылғысының аумағын жоспарлау жұмыстары аяқталды, бұл алаңды жоғары кернеулі жабдықтарды монтаждауға толық дайындауға мүмкіндік береді. Нысандар бойынша жобалық-сметалық құжаттама мемлекеттік сараптамадан өтуде.

500 кВ «Өлке – Қарабатан» әуе электр беру желісінің құрылысы практикалық іске асыру кезеңіне өтті. Желі трассасы бойында тіректерге арналған 1 181 іргетас жеткізілді, оның 860-ы орнатылды. 91 металл тірек жиынтығы жеткізіліп, 37 тірек монтаждалды. Құрылыс жұмыстары бірнеше учаскеде қатар ұйымдастырылып, бұл құрылыстың тұрақты қарқынын сақтауға мүмкіндік беріп отыр.

Батыс Қазақстанның энергожүйесін елдің БЭЖ-мен біріктіру жобасы ұлттық электр энергетикасы үшін жүйелік маңызға ие. Жобаны іске асыру 500 МВт-қа дейінгі қуатты тасымалдауды қамтамасыз етуге, өңірдегі болашақ электр энергиясы тапшылығын жабуға, Атырау және Ақтөбе облыстарындағы электр станцияларының қуат беру көлемін ұлғайтуға, Ақтөбе энергия торабын электрмен жабдықтаудың сенімділігін арттыруға, сондай-ақ жаңа тұтынушылар мен инвестициялық жобаларды қосу үшін жағдай жасауға мүмкіндік береді.